【神Deal】莫帥落閘 C朗返曼聯冇行?

【神Deal】莫帥落閘 C朗返曼聯冇行?

作者:Liz    發表日期:2017-06-18 10:02:01

皇家馬德里王牌基斯坦奴朗拿度,呢幾日被傳會離開皇馬,仲將返曼聯訂為唯一目標,紅魔迷個個叫好,就連名將碧咸都想成事。不過,現任「魔君」莫連奴似乎唔想畀佢返嚟喎!

未講寸王,先講咸爺點睇C朗想返曼聯先。呢位英格蘭一代中場近日接受訪問個時話:「畀我就算要爬都爬番去,可惜我從來都冇機會。如果C朗真係要離開皇馬,我個人認為佢應該要返曼聯。」

雖然咸爺都話C朗「回家」係好事,但係寸王唔係咁睇。外國傳媒指今季帶紅魔奪得歐霸盃嘅莫連奴,似乎想專注完成艾華路莫拉達嘅收購,由於標價已經7,000萬(約6.97億港元),要再出大量資金去買身價高達1.8億鎊嘅C朗睇嚟冇乜可能。

C朗重返紅魔一事愈吹愈勁,外國傳媒仲攞番寸王同C朗喺皇家馬德里共事3季嘅恩恩怨怨出嚟講。C朗喺2010至13年間喺寸王指揮下,名副其實變成超級入球機器,3季都轟入超過50球,第2季更係驚人地喺55場波入60球。不過,2013年1月西班牙盃8強對華倫西亞贏2:0場波,C朗喺比賽末段畀寸王鬧唔返後,自己失誤又畀華倫有機會再攻,賽後寸王忍唔住話C朗,令到呢位巨星火都嚟,仲企起身大大聲鬧寸王:「我幫你做咁多嘢,你咁對我!?」

當時有報道話寸王回避咗一陣,以為C朗平心靜氣可以再提起件事,點知C朗又火起,今次連莫連奴都躁埋,雙方仲要球員出手隔開,先冇由口講變講手。

雙方關係之後變差,寸王個季離開之後都曾經批評C朗:「佢唯一問題係教練話佢,佢唔肯聽,認為自己已經知道晒所有嘢,教練幫唔到佢進步。」雖然佢兩個經理人都係文迪斯,但係咁多年嚟關係都冇乜改善,上年歐國盃仲隔空開火,C朗想返曼聯,最大阻力可能係行事我行我素嘅寸王。

東網體育同你追實體壇每個精彩時刻! 
http://bit.ly/2ecTF2A 


本文来源:http://hk.on.cc/hk/bkn/cnt/sport/20170618/bkn-20170618085002257-0618_00882_001.html