【有片】招牌炮彈入波 普多斯基射爆三獅

【有片】招牌炮彈入波 普多斯基射爆三獅

作者:Cora    發表日期:2017-03-23 08:04:02

即睇普多斯基告別靚波:http://bit.ly/2nThbVl 

完美謝幕,感動滿分!被譽為德國國家隊近年其中一位最出色前鋒嘅普多斯基,今晨喺佢國家隊告別戰,以一記其招牌炮彈式遠射入波,射爆宿敵英格蘭大門,領德國以1比0勝出呢場重量級友賽,並為佢嘅國際賽生涯寫下完美句號!

31歲嘅普多斯基今場係佢國家隊生涯以來,首次以隊長身份出戰,而領隊勒夫安排咗包括甘美治、利萊辛尼、祖利安白蘭特及迪姆華拿等披甲,令「日耳曼兵團」改朝換代氣氛更濃。賽前大量德國球迷都着起呢位「王子」嘅波衫,以及戴上佢嘅頸巾,而喺多蒙特嘅西法倫球場南看台則高掛住一幅寫上「130場、48入球、一位傳奇,多謝Lukas」嘅橫額。

歷來第130次為國披甲嘅普多斯基,喺國家隊上陣次數就僅次傳奇隊長馬圖斯同經典射手高路斯,係德國隊史以來上陣第3多嘅球員。佢喺賽前致辭話:「多謝多蒙特、多謝科隆、多謝德國!」將現場氣氛推上高峰。

德國今場雖有主場之利,不過上半場就以英格蘭形勢較佳,只係臨門一腳就成為今場勝負分野。「三獅兵團」早段就有拉爾拉拿禁區內左腳射中柱,至於德國則只得零星攻勢,「德國王子」嘅勁射則被英軍門將赫特擋出。全場唯一入球出現喺69分鐘,德國喺禁區外幾吓短傳,然後由普多斯基喺25碼用一記重炮狂轟,直飛龍門右上角,赫特飛盡都救唔到,終為德國鎖定勝局贏1比0。「德國王子」則喺84分鐘被調離場,等佢最後一次着住國家隊波衫,接受球迷歡呼道別,完美離場!

東網體育同你追實體壇每個精彩時刻! 
http://bit.ly/2ecTF2A 


本文来源:http://hk.on.cc/hk/bkn/cnt/sport/20170323/bkn-20170323054430424-0323_00882_001.html