萌力大曬 女生愛上高達頭?

萌力大曬 女生愛上高達頭?

作者:catherine    發表日期:2018-08-14 22:42:47

正如樓盤廣告嘅宣傳照,認真便輸了,所以小編好多時睇到玩具新品嘅官圖,都會保持懷疑態度,官圖美限美,有邊個玩具迷唔清楚?不過Bandai最近喺網上力谷嘅高達與自護號大頭Cushion,再冷靜嘅毒男都會產生幻想,想入非非嘅唔係產品本身,而係呢輯宣傳照搵咗一位可愛女生做Model,仲同呢Pair Cushion玩得鬼咁開心,令人覺得佢係真心鍾意高達……天啊,唔通「男人愛高達,女人唔明白」呢個魔咒,終於有公主現身解除?唔通世界上真係有女生,與你志同道合可以因為高達而Happy Together?

發完夢未?夠鐘醒未?想搵愛高達嘅女生要睇彩數,不過想將呢Pair高達Cushion據為己有,唔難,誠惠4,536日圓。呢Pair新品採用Q版設計,分別係「一年戰爭」最後一幕嘅RX-78-2 Gundam與MSN-02 Zenog,故事中兩者可謂兩敗俱傷,如今亦剩番個頭,還幸造型夠Cute又軟綿綿,當攬枕又得,做枕頭都得,放喺椅墊畀背脊挨住亦得,可愛又實用,話唔定真係吸引到女生愛高達喎,到時咪可以借啲意……就算想「奸計」得呈都要畀啲耐性,因為要等到明年1月才開售,巴打都係咪發夢住了,返埋位開工吧啦!


本文來源:http://hk.on.cc/hk/bkn/cnt/lifestyle/20171203/bkn-20171203150012481-1203_00982_001.html