【英超實況】21紅牌打吡!默郡火併有陣!

【英超實況】21紅牌打吡!默郡火併有陣!

作者:Claudia    發表日期:2017-04-01 19:02:04

英超今輪爆發最刺激打吡戰,利物浦大戰愛華頓。呢對默西塞德郡仇人,雙方勢如水火,每次碰頭都火花四濺。唔係得個講字,堅係有數據支持,92年開展英超時代後,默郡打吡總共出現過21張紅牌,係英格蘭球壇眾多打吡中最多嘅,就知呢兩隊波有幾癲喪!

利物浦目前係領先同市死敵6分,但愛華頓近4戰贏3場,球隊對前6位置虎視眈眈,加上紅軍有拉爾拉拿受傷唔出得,而巴西雙雄菲臘比古天奴同羅拔圖法明奴,剛為巴西國家隊上陣,今場有冇力踢都成問題,故紅軍雖有主場之利,都未必佔到甜頭,總之今晚7點半就有好戲睇啦。

跟手10點有曼聯出場,佢哋上輪終於擺脫6哥惡名,成功升上第5位,今輪紅魔主場鬥西布朗,表面上好似食硬對手,但查實紅魔今輪有伊巴謙莫域停賽,而且保羅普巴亦有傷在身,曼聯喺殘陣之下,係咪可以擊退西布朗呢?黐實《東網》,就可以睇到即時戰情喇。

【18:45】利物浦 對 愛華頓 有陣
今晚英超頭場爆發默西賽德郡打吡,由利物浦主場硬撼愛華頓,雖然紅軍有拉爾拉拿、佐敦軒達臣等主力因傷倦勤,但中堅洛夫雲傷愈復出鎮守防線,有傳受傷嘅門神米洛列特亦無礙披甲,連同3叉戟沙迪奧文尼、羅拔圖法明奴及菲臘比古天奴,火力強勁。但另一邊廂,愛
華頓亦有位居射手榜1哥嘅盧卡古壓陣,加上打吡戰必定打甩髀,邊隊會贏打過至知。

利物浦正選陣容
門將:米洛列特
後衞:尼達利基尼、祖爾麥迪比、洛夫雲、占士米拿
中場:拉爾拉拿、安利簡恩、韋拿杜姆
前鋒:沙迪奧文尼、羅拔圖法明奴、菲臘比古天奴

愛華頓正選陣容
門將:祖爾盧保斯
後衞:賓寧頓、菲臘積基爾卡、艾殊利威廉斯
中場:賀基迪、伊祖沙古爾、湯姆戴維斯、巴尼斯
前鋒:巴克里、盧卡古、卡維特利雲


本文來源:http://hk.on.cc/hk/bkn/cnt/sport/20170401/bkn-20170401182708512-0401_00882_001.html